ՀՈԳԵՎՈՐ ԴԱՍԸՆԹԱՑ

ԱՅՍ  ՀՈԳԵՎՈՐ  ԿՐԹՈւԹՅԱՆ  ՏԵՍԱՇԱՐԸ  ՆՎԻՐՎԱԾ  Է

ՀԻՍՈւՍ  ՔՐԻՍՏՈՍԻ  ԵԿԵՂԵՑՈւ  1980  ԱՄՅԱԿԻՆ

դասընթացը վարում է Հիսուս Քրիստոսի առաքյալ

ՄԻԼԱԶԻՄ ՌԱՍՈՅԱՆԸ

ԴԱՍ - 1 - ԱՍՏՎԱԾԱՇՈւՆՉ

Աստվածաշունչը Աստծո խոսքն ու միտքն է մարդկանց բառերով, որն ամփոփված է Ավետարանով: Այն կատարյալ գործ է, որի մեջ շոշափված են մարդու ամեն կարիքներն ու զգացումները: Ուստի դրա վրա որևէ բան ավելացնելն ու դրանից պակասեցնելը արգելված է Աստծո կողմից:

ԴԱՍ - 2 - ԱՍՏՎԱԾ

Աստված ինքնագոյ Հոգի է` Հոր, Որդու և Սուրբ Հոգու Եռամիասնությունը, որը մեկ է, միակն է և մեկացած է, որից բացի ուրիշ Աստված չկա:

Նա կատարյալ է սիրո, սրբության, կարողության, գիտության և իմաստության մեջ և հավիտյան անփոփոխ է:

Նրա ձեռքով ստեղծվեցին երկինքը, երկիրը և ամեն ինչ, որ նրանց մեջ կան` տեսանելին և անտեսանելին: Եւ ամենուրեք ամեն ինչի վրա է, ամենքի հետ է և իրեն ընտրած մարդկանց` ամենքի մեջ է:

ԴԱՍ - 3 - ՄԱՐԴ

Մարդն Աստծո պատկերով ստեղծված անձնավորություն է, որը մեղանչելով պղծեց իր ողջ էությունը` մարմինը, շունչը և հոգին: Սակայն նրան ստեղծող Աստվածն իր Որդի Հիսուս Քրիստոսի խաչի գործով հնարավորություն է տվել, որ մարդը ստանա մեղքերի թողություն, փրկություն և հնարավորություն` աճելու ու Աստծո գլխավոր նպատակին հասնելու, այսինքն Հիսուս Քրիստոսին նմանվելու:

ԴԱՍ - 4 - ՄԵՂՔ

Մեղքն անիրավ և անօրեն արարք է, որն առաջացավ Սատանայի սրտում և նրա ձեռքով էլ բերվեց աշխարհ, սակայն Ադամով մտավ աշխարհ, և այդ մեղքով մահը տարածվեց Ադամի ողջ սերնդի վրա, որի հետևանքով նրանք դարձան մեղանչական և մահկանացու` վնասվեց մարդու ողջ էությունը: Հետևաբար` Աստծո պատկերով ստեղծված մարդը զրկվեց Աստծո փառքից և հավիտենական կյանքի փոխարեն մահվան դատաստան եկավ նրա վրա` կյանքի Օրենքի փոխարեն մարդու մեջ սկսեց գործել մահվան օրենքը: Սակայն մեղքից և դրա հետևանքից` հավիտենական տանջանքից մարդը կարող է փրկվել Աստծո Որդի Հիսուս Քրիստոսին հավատալով:

ԴԱՍ - 5 - ԱՍՏԾՈ ՕՐԵՆՔ

Աստծո Օրենքը սուրբ է` բարձր է գոյություն ունեցող ամեն օրենքներից, և նրանով բացահայտվում է իրավունքի և անիրավության սահմանը: Օրենքով մարդը տեսնում է Աստծո և իր ինչպիսին լինելը և Երկնքի Արքայությունում տիրող սուրբ իրավիճակը: Թեև Օրենքով մարդը հասկանում է իր մեղավոր ու կորսված լինելը, սակայն նրանով չի փրկվում, այլ Տեր Հիսուս Փրկչի օգնության կարիքն է զգում: Եւ Տեր Հիսուսով փրկվածները, անիրավությունից հեռու մնալով, պետք է իրավունքի մեջ քայլեն:

ԴԱՍ -6- ՀԻՍՈւՍ ՔՐԻՍՏՈՍ

Հիսուս Քրիստոսը Սուրբ Եռամիասնության մեկ անձն է` Աստծո միածին Որդին` նրա էությունից դուրս եկած, ոչ թե արարված:

Աստծուն հավասար լինելով չտարվեց այդ փառքով, այլ իր դիրքով ցածրացավ, իսկ վիճակով մնաց որպես ճշմարիտ և երկրպագություն ընդունող Աստված:

Եւ մեզ` կորսված մարդկանց Չարի իշխանությունից փրկելու և Աստծո Թագավորության մեջ դնելու նպատակով երկնքից եկավ աշխարհ` Սուրբ Հոգու զորությամբ, Աստծուն հավատարիմ կույս Մարիամից ծնվեց, կատարյալ մարդ եղավ` մարդկային բնություն և մարմին ստանալով, սակայն մեղք չգործեց, միևնույն ժամանակ մնալով կատարյալ Աստված մարմնի մեջ:

Եւ այդ մարմնում դատապարտեց մեր մեղանչական բնությունը և ողջ աշխարհի մեղքերի պատիժը իր վրա վերցնելով խաչի վրա մեռավ, թաղվեց և երրորդ օրը նույն մարմնով հարություն առավ: Երկինք համբարձվեց և Հայր Աստծո աջ կողմը նստեց: Հոր փառքով կվերադառնա և ողջերին ու մեռելներին հարությունից հետո կդատի իրենց գործերի համեմատ: Եւ նրա` արդեն իսկ սկսած Թագավորությանը վերջ չի լինի:

ԴԱՍ -7- ՓՐԿՈւԹՅՈւՆ

Փրկությունը Աստծո Սուրբ Եռամիասնության գործն է, որը կատարվեց Հիսուս Քրիստոսի անձով: Եւ Աստված այն ձրի է պարգևում այն մարդուն, ով հավատում է, թե Հիսուս Քրիստոսը մեռավ իր մեղքերի համար և հարություն առավ: Եւ այդ հավատքով ապաշխարողը փրկվում է մեղքից և դրա հետևանքից, ինչպես նաև Սատանայի իշխանությունից փոխադրվում է Աստծո իշխանության տակ:

ԴԱՍ -8- ՇՆՈՐՀՔ

Շնորհքը Աստծուց տրված ձրի բարիք է, որը կախում չունի մարդու գործերից, արժանիքներից և ազգությունից: Ողջ տիեզերքը Աստծո շնորհքի հաշվին է ապրում, իսկ նրա հավիտենական շնորհները տրվում են միայն այն մարդկանց, ովքեր հավատում են Աստծո Որդի Հիսուս Քրիստոսին: Եւ այդ շնորհքը մարդը կարող է պահել նրան հնազանդվելով:

ԴԱՍ -9- ԿԱՆՉ

Աստծո կանչը աշխարհին հնչում է Ավետարանի խոսքով, որը կանչում է դեպի Քրիստոս Սուրբ Հոգու զորությամբ: Եւ այդ խոսքը իրեն ընդունողի կյանքում իրագործում է Աստծո նպատակը: Թեև այս կանչը Աստծո զորությամբ և ներկայությամբ է, սակայն անդիմադրելի չէ. մարդն ունի իր ընտրության քայլը, իսկ մերժելու դեպքում նա պատասխանատու է, որովհետև անիրավությունից արդարության և կորստից փրկության չի գալիս:

ԴԱՍ -10- ԱՊԱՇԽԱՐՈւԹՅՈւՆ

Ապաշխարությունը, դա չար խորհուրդներից և գործերից հրաժարվելն ու դառնալն է դեպի Աստծո կամքը, որը Աստծուց մարդուն տրված բարի հնարավորություն է, առանց որի մարդը չի կարող Աստծո պատրաստած փրկությունը ունենալ:

ԴԱՍ -11- ՀԱՎԱՏՔ

Հավատքը լսած խոսքը ընդունելն ու դրա հետ հոժարվելն է, որով հավատացողը վերցնում է Աստծո բարիքները:

Աստվածային հավատքի օբյեկտը ճշմարիտ Աստված է, որի աղբյուրը աստվածաշնչային խոսքն է, իսկ փրկարար հավատքը ծնվում է Հիսուս Քրիստոսի փրկագործության մասին վկայություններից:

ԴԱՍ -12- ՎԵՐՍՏԻՆ ԾՆՈւՆԴ

Վերստին ծնունդը Աստծո գործն է, որը մարդը ստանում է Հիսուս Քրիստոսին հավատալով: Եւ հենց վերստին ծննդի շնորհիվ մարդը ձեռք է բերում աստվածային սուրբ բնություն և Աստծո ներկայությամբ սկսում է ապրել նոր կյանքով:

ԴԱՍ -13- ԱՐԴԱՐԱՑՈւՄ

Արդարացումը Աստծո գործն է, որով բացահայտվում է հավատացողի նոր մարդ լինելը որպես բացարձակ արդար` Հիսուս Քրիստոսի խաչի մահով և հարությունով:

ԴԱՍ -14- ՈՐԴԵԳՐՈւԹՅՈւՆ

Աստծո ծրագրի մեջ որդեգրությունը վերստին ծնվածների համար է, որով Աստծո որդիները ձեռք են բերում Աստծո ժառանգություն ստանալու իրավունք:

ԴԱՍ -15- ՍՐԲԱՑՈւՄ

Սրբացումը Աստծո գործն է, որը հիմնված է Հիսուս Քրիստոսի մահվան, հարության և Աստծո աջում լինելու վրա: Որով Հիսուս Քրիստոսին դարձած մարդը դրվում է սուրբ դիրքում՝ Աստծուն պատկանելու համար: Եւ այդ դիրքի պատճառով հավատացողը հնարավորություն է ստանում սուրբ վիճակում աճելու՝ մեղքից ազատ կյանք ապրելու:

ԴԱՍ -16- ՓԱՌԱՎՈՐՈւՄ

Արարիչ Աստված մարդու համար ծրագրել է, որ հավատքի միջոցով, նրան փառավոր դիրք և վիճակ տա, որպեսզի հասցնի Հիսուս Քրիստոսի փառքին:

ԴԱՍ -17- ՔՐԻՍՏՈՍԻ ՀԵՏ ՄԵԿԱՑՈւՄ

Աստված ծրագրել է, որ մարդուն մեկացնի իր հետ, և այդ մեկացումը իրականանում է Հիսուս Քրիստոսին հավատացող և նրան հնազանդվող մարդու կյանքում, որով  նա ձեռք է բերում աստվածային բոլոր օրհնությունները:

ԴԱՍ -18- ՕՐՀՆՈւԹՅՈւՆ  ԵՎ  ԱՆԵԾՔ

Օրհնություն նշանակում է բարիք` նվեր, ընծա կամ օգնություն, իսկ անեծք նշանակում է չարիք` զրկանք կամ վնաս:

ԴԱՍ -19- ՍՈւՐԲ  ՀՈԳԻ 

Սուրբ Հոգին Աստծո Եռամիասնության մեկ անբաժանելի անձն է՝ Աստված դիրքի ու վիճակի մեջ՝ ոչ ավելին և ոչ էլ պակաս: Նրա մեջ են մկրտվում Հիսուս Քրիստոսին հավատացողները, որոնց նա առաջնորդում է ամեն ճշմարտության մեջ:

ԴԱՍ -20- ՍՈւՐԲ  ՀՈԳՈՎ ՄԿՐՏՈւԹՅՈւՆ

Սուրբ Հոգով մկրտողը Տեր Հիսուս Քրիստոսն է: Նա իրեն հավատացող և դարձի եկող ամեն մարդու մկրտում է Սուրբ Հոգով, որպես աստվածային ժառանգության գրավ:

ԴԱՍ -21- ԵԿԵՂԵՑԻ

Եկեղեցին Հիսուս Քրիստոսին դարձած հավատացողների միաբան ժողովքն է՝ կանչված և առանձնացված Աստծո համար՝ Նրա գլխավոր նպատակին հասնելու՝ Հիսուս Քրիստոսին նմանվելու:
Եւ ամեն դարերում եկեղեցին պետք է Աստծո Արքայության Ավետարանը քարոզի և ուսուցանի (առանց ավելացնելու և պակասեցնելու), և կատարի ջրով մկրտություն՝ Հոր, Որդու և Սուրբ Հոգու անունով և տերունական ընթրիք:

ԴԱՍ -22- ԱՆՁՆԱԿԱՆ ՎԿԱՅՈւԹՅՈւՆ

Ավետարան վկայելը Աստծո որդիների իրավունքն ու պարտականությունն է, որի հիմանական թեման Տեր Հիսուս Քրիստոսի փրկարար գործն է, որպեսզի Արքայության Ավետարանի տարածման միջոցով մարդիկ հավատալով ստանան փրկության հնարավորություն: